Hèm qu'era tecnologia comprengue e parle er aranés
Se volem qu’es naues tecnologies parlen e comprenguen er aranés, auem de besonh arténher centenats d’ores de votz enregistrada per fòrça persones parlantes d’aranés.
T’i ahiges?
Contribuís ath Projècte Araina
Ara madeish non ei possible qu’es maquines parlen o comprenguen aranés. Entà qu’aquerò sigue possible s’a de besonh ua basa de donades damb centenats d’enregistraments de votzes en aguesta lengua. Enregistrar era tua votz ei simple, sonque te cau seguir es indicacions dera plataforma Common Voice. Era tua votz servirà entà bastir eth prumèr còrpus de votz en aranés a compdar dera participacion collectiva.
Maraton de votzes en Vielha
Era dimenjada de 17-18 Diciembre 2022, era Maraton de votzes deth Projecte Araina recuelhec mès de 8 ores de votz enregistrades en aranés d’un centenat de participants. Era activitat, celebrada en format presenciau e virtuau, compdèc damb persones de parlar aranés de diuèrses edats, registres e parlars que s’enregistrèren en tot liéger enquia 4.000 frases en aguesta varietat dera lengua occitana. Podetz liéger mès resultats deth maraton en aguesta notícia.
Eth Projècte Araina, votzes en aranés
Er objectiu deth Projècte Araina ei contribuïr ara subervivença der aranés mejançant era creacion d’un còrpus de parlar en aguesta varietat occitana. Era reconeishença automatica de votz ei un compausant de besonh en desvolopament d’assistents basadi en intelligéncia artificiau e a de besonh centenats d’ores de donades de parlar de fòrça persones parlantes dera lengua.
En cas des lengües majoritàries, eth procès de generacion des prototipes e eth desvolopament des tecnologies deth parlar ei relativaments simple mercés ara existéncia des servicis balhadi pes enterpreses tecnologiques. Per contra, ei malaisit de trobar solucions entàs lengües minoritzades coma er aranés. Aguesta ei ua des conseqüéncies dera henerècla tecnologica entre es lengües damb recorsi sufisents e es lengües damb mens recorsi, causa qu’agrèuge encara mès eth perilh d’escandilhament digitau d’aguestes.
Qui èm?
Eth Projècte Araina ei possat pera cooperativa Col·lectivaT damb era collaboracion des recercaires Jordi Suïls Subirà e Helena Torres Purroy, dera Universitat de Lhèida e membres deth Conselh Consultatiu der Aranés.
Col·lectivaT ei ua cooperativa sense tòca lucrativa que promò era coneishença dubèrta e eth dialòg entre diferentes realitats, mejançant era recèrca sociau e era prestacion de servicis lingüistics e tecnologics. Laguens d’aguest darrèr encastre, un des sòns prètzhèts centraus ei eth desvolopament de tecnologies innovadores ath servici de lengües minoritzades. En aguest sens, an desvolopat eth prumèr sintetizador de votz basat en hilats neuronaus en catalan, eth Catotron, e collaboren tostemp entara digitalizacion de lengües coma er amazic, eth judèo-castelhan e eth galhec.
Eth Projècte Araina ei subvencionat peth Departament de Cultura dera Generalitat de Catalonha en encastre des “Subvencions entà promòir era coneishença e er usatge der occitan, aranés en Aran, en Catalonha” e recep eth supòrt deth Conselh Generau d’Aran, Lo Congrès permanent de la lenga occitana e era fondacion Mozilla.
Notícies
Darrères notícies publicades sus eth Projècte Araina
Contacte
Entà mès informacion pòs contactar a trauès deth corrèu info@collectivat.cat
Se vòs èster ath dia sus es usatges innovadors des tecnologies deth parlar e er aranés, dèisha-mos eth tòn corrèu electronic entà soscriuer-te ath bulletin.
Col·lectivaT emplegarà aguesta informacion entà èster en contacte damb tu a trauès deth bulletin setmanau e per comunicacions extraordinàries dera entitat. Auem de besonh que confirmes qu’encara vòs recéber es corrèus. S’en bèth moment càmbies d’opinion, te pòs dar de baisha en ligam que trobaràs ath pè de pagina de quinsevolh des corrèus electronics qu’arreceberàs. Entà obtier mès informacion sus era nòsta politica de privadança, visita eth nòste lòc wèb. En hèr clic ara seguida, accèptes que poderam tractar era tua informacion d’acòrd damb aguesti tèrmes.
